{ سامحيني يا أمّا } - عامية

عارفة ليه قلبي انتفض..

صرخة سكوني..

اللي رفض..

علشان بحبك..

وما كنت يوم..

 م اللي قبض ..

صرخت..

 وصرختي نِدا جوعي ..

صرخة عيالي تنتظر..

 ساعة رجوعي ..

وفي إيدي لقمة ..

لقمة حاف..

 تتخفى وراها دموعي ..

عَلا صوتي ولوعتي ..

وجعين ..

عليكي يا طاهرة..

 لما اتجبروا الفاسدين..

وعلى ابني ..

اللي راح ف عبّارة..

وحطيت بإيدي ع الصورة..

 خطّين..

مستكترين عليّا أصرخ ..

وأقول لأ..

ما خلاص الإيدين في الشق ..

وأنا الموجوع وأنا المقهور ..

وأنا المدبوح..

 وأنا اللي صاحب الحق..

منا طول عمري ماشي جنب الحيط..

عارف حدودي..

 وعمري ما اتخطيت..

محنا الغلابة..

 اللي نقول علطول نعم..

واحنا اللي نستقبل علاوة بالزغاريد..

تسمع صوت الأدان والجرس..

جوة الميدان..

 وسط الحرس..

بيقولوها بعلو صوت ..

من انهاردة..

 ما فيش خَرَس..

هيموّتوني ؟!

 منا ميت من زمان..

عايش بدن..

 لكن ما فيش إنسان..

قتلوا البراءة والسعادة والأمل..

قتلوا بكرة..

 واختفى منه الأمان ..

سامحيني يا أمّا لما ثُرتْ..

 وبقيت شهيد..

أوعي قلبك يتحرق..

 خلّيه حديد ..

لجل ما تدوقي حلاوة الحرية..

ودمي اللي نزف..

 يطرح مليون وليد..

قولي للي كتم صوتي بالإرهاب..

إن كيده ومكره وخاب..

وإني في الجنة ونعيمها يا أمّا ..

وإنه بكرة .. هيشوف عذاااب..

وقوليلو مصر أكبر م الكراسي..

فكريه يا أمّا شكله ناسي..

أنا الشعب حَمول وبصْبُر ..

واللي يهينّي تمنه مداسي ..

و كل وقت وليه أدان ..

وأنا النهاية وأنا العنوان ..

وأنا اللي باقي رغم الظروف..

لأني ببساطة ..

أنا الحياة وأنا الأوطان ..

****************************